Aaron Ramsdale markvörður Bournemouth er í áfalli eftir að hafa fengið kórónuveiruna og kveðst hafa farið eftir öllum reglum á meðan útgöngubann var í landinu.

Ramsdale var greindur með veiruna á föstudag fyrir æfingu hjá Bournemouth en hann var ekki með nein einkenni. Hann þarf að vera í einangrun í sjö daga áður en hann fer aftur í próf.

„Þetta var áfall, ég hef ekki hitt neinn og er með þetta,“ sagði Ramsdale sem kveðst aðeins hafa farið út í búð til að versla í matinn og svo aftur heim.

„Ég hef ekki nein einkenni, það hræðir mig að ungur maður í góðu formi sé með hana. Það er ekki frábært að hafa hana en það er gott að ég er einkennalaus.“

Ramsdale þarf að hanga heima næstu daga. „Ég hef farið eftir öllum reglum, ég hef bara verslað í matinn og það hræðir mig. Það eru fleiri sem hafa þetta og ég þarf ekkert að skammast mín.“