Áslaug Arna Sigurbjörnsdóttir dómsmálaráðherra hefur sett reglugerð sem gerir hverjum manni á Íslandi á aldrinum 18–65 ára skylt að vinna frítt fyrir almannavarnir í neyðarástandi. Þessi vinna er án endurgjalds, ókeypis fyrir ríkið.

Þetta getur falist í eldvörnum, björgun og sjúkraflutningum, ruðningsstarfi, hjálparstarfi vegna tjóns af völdum geislavirkni, sýkla eða eiturefna, löggæslu, fjarskiptaþjónustu og félagslegu hjálparstarfi.

Það er bannað að segja nei, það er bannað að hlaupa úr starfi, og ef almannavarnir hafa kvatt þig til aðstoðar þá er þér bannað að fara út úr lögsögu þinni án leyfis.

Þarna hefur ríkinu verið veitt heimild til að ganga freklega inn á rétt borgara til sjálfsákvörðunar frelsis. Nánast mætti jafna þessu við herskyldu þótt það sé ekki sagt berum orðum, en bann við herskyldu má meðal annars finna í nýju stjórnarskránni sem aldrei varð að veruleika.