Manchester United vann gríðarlega mikilvægan sigur í ensku úrvalsdeildinni í fyrradag er liðið mætti Manchester City. United er í harðri baráttu um Meistaradeildarsæti og var sex stigum frá Chelsea fyrir leikinn í gær.
Chelsea lagði Everton 4-0 en United tókst að svara og lagði grannana sína 2-0 á Old Trafford. Leikurinn var ágætis skemmtun en tvö mörk voru skoruð og það voru heimamenn sem gerðu þau bæði. Anthony Martial skoraði fyrra markið á 30. mínútu eftir laglega aukaspyrnu Bruno Fernandes. Ederson í marki City hefði þó mátt gera betur.
Ederson gerði sig svo sekan um önnur mistök í uppbótartíma er hann henti boltanum á Scott McTominay sem þakkaði pent fyrir sig og skoraði í autt markið af löngu færi.
Ensk blöð segja að Ole Gunnar Solskjær, stjóri United hafi hrósað sínum mönnum eftir leik en einnig varað þá við. Þrátt fyrir góðan sigur, þyrftu leikmenn að halda sér rólegum.
Solskjær sagði við leikmenn að þeir þyrftu að halda sér niðri á jörðinni og ítrekaði það reglulega, hann vill halda leikmönnum á tánum.
