Argentínska goðsögnin Hugo Gatti segir að það sé að skemma fyrir Barcelona að vera með Lionel Messi í liðinu.

Messi er orðinn 33 ára gamall en hann hefur í mörg ár verið aðalvopn Barcelona í sókninni.

,,Mér er alveg sama þó þeir gagnrýni mig í Argentínu. Ég er mjög argentínskur og Messi er ekki sama undur og hann var áður,“ sagði Gatti.

,,Þeir koma rangt fram við hann því þeir gera hann stærri og stærri og það er rangt. Hann venst því og byrjar að labba á vellinum. Hann þarf að vera betri.“

,,Þegar þú ert með leikmann eins og Messi þá er það eins og að vera með Maradona eða Pele, liðsfélagarnir gefa á þig til að vinna leikinn.“

,,Það eyðileggur liðið og þeir gefa ekki allt í sölurnar. Þeir venja sig á að gefa á hann og engan annan.“