Yfirvöld á Bretlandi eru uggandi vegna COVID-19 veirunnar sem nú er að breiða sér hratt út um landið, þessi veira er að greinast víða í Evrópu þessa dagana, meðal annars á Íslandi.

Samkvæmt Telegraph óttast yfirvöld fjölmenna viðburði og er það til skoðunar að banna íþróttaviðburði næstu tvo mánuðina, til að reyna að koma í veg fyrir frekari útbreiðslu á veirunni. Tugir þúsunda mæta á hvern leik í ensku úrvaldeildinni, smithættan þar er því mikil.

Þá yrði hætt við alla leiki í deildinni og segir Telegraph að ekki sé öruggt að Liverpool verði því enskur meistari. Engar reglur eru til um slík mál, ef ekki væri hægt að klára deildina. Liverpool hefur 22 stiga forskot þegar 10 leikir eru eftir.

Jurgen Klopp, stjóri Liverpool var spurður um málið og hann segir það tóma þvælu.

,,Stuðningsmenn Liverpool eru ekki vitlausir, þeir trúa þessum fréttum ekki,“ sagði Klopp og hefur engar áhyggjur, eðlilega.