Óvæntustu úrslit tímabilsins í ensku úrvalsdeildinni áttu sér stað í kvöld er Liverpool heimsótti Watford.
Liverpool hefur verið óstöðvandi á tímabilinu og var fyrir leikinn með 22 stiga forskot á toppnum.
Liðið hafði ekki tapað leik í 28 umferðum en gerði eitt jafntefli gegn Manchester United.
Watford var óvænt miklu betri aðilinn gegn verðandi meisturum í kvöld og vann sannfærandi 3-0 heimasigur.
Ismaila Sarr skoraði tvö fyrir Watford í seinni hálfleik en hann komst ítrekað inn fyrir vörn gestanna.
Sarr lagði svo upp síðasta mark leiksins á Troy Deeney til að tryggja Watford ótrúlegan 3-0 heimasigur.
Það var talað um leikinn á meðal stuðningsmanna Liverpool á Íslandi og var nóg um að vera í kommentakerfinu.
Þar virðast stuðningsmenn vera sammála um það að tapið hafi verið sanngjarnt og að Watford hafi átt sigurinn skilið.
,,Óhætt að segja að Watford hafi gjörsigrað okkur að öllu leyti í dag, hefði meira að segja getað farið verr,“ skrifar einn á Facebook síðu Liverpool.
Annar bætir við: ,,Sorglega hræðileg frammistaða okkar manna. Þykist ég viss um að Klopp ætlaði að tapa því þetta er svo langt frá því sem þeir hafa sýnt.“
Sá þriðji segir svo: ,,Áttu þennan sigur svo sannarlega skilið! Frábær leikur hjá þeim í Watford, það er bara að rífa sig í gang fyrir næsta leik og halda höfði!“
Tölfræðin úr leiknum talar sínu máli en Liverpool átti aðeins eitt skot á rammann og sjö tilraunir alls.
