Philippe Coutinho, er orðaður við endurkomu til Liverpool en miðjumaðurinn frá Brasilíu hefur ekki fundið takt sinn eftir að hann fór frá Anfield. Coutinho var með læti í janúar árið 2018, hann vildi komast burt.

Coutinho fékk það í gegn og var seldur til Barcelona fyrir um 140 milljónir punda, þar gekk ekkert. Hann var lánaður til FC Bayern síðasta sumar og þar gengur lítið, hann situr nú sem fastast á bekknum.

Coutinho verður til sölu í sumar og hefur hann verið orðaður við endurkomu, The Athetic segir hins vegar að Liverpool sé ennþá með óbragð í munni eftir að Coutinho fór.

,,Vertu áfram hér og þú verður goðsögn, hjá Barcelona, Bayern eða Real Madrid verður þú bara leikmaður. Hér getur þó orðið meira,“ á Jurgen Klopp að hafa sagt við Coutinho undir lok árs 2017, það dugði skammt. Coutinho fór fram á sölu og fékk að fara.

Hvernig Coutinho kom fram við félagið er sagt hafa skilið eftir óbragð í munni Liverpool og Klopp, það bragð er enn í dag. Það gæti komið í veg fyrir að Coutinho geti snúið aftur.

Án Coutinho hefur Liverpool líka farið í tvígang í úrslit Meistaradeildarinnar og unnið hana einu sinni. Þá er félagið að vinna ensku úrvalsdeildina í fyrsta sinn í 30 ár.