Það eru margir hissa á Jurgen Klopp, stjóra Liverpool og umdeildri ákvörðun hans. Klopp ætlar ekki að mæta til leiks gegn Shrewsbury í enska bikarnum og bara leikmenn úr vara og unglingaliði félagsins mæta.

Liverpool þarf að mæta Shrewsbury aftur í bikarnum eftir 2-2 jafntefli í gær, leikurinn fer fram þegar vetrarfrí er í ensku úrvalsdeildinni.

Klopp ætlar sjálfur í frí og hefur gefið öllum leikmönnum aðalliðsins frí, margir eru óhressir með þessa ákvörðun Klopp enda hefur bikarinn haft mikla virðingu á Englandi.

Ian Herbert blaðamaður á Daily Mail er einn af þeim sem er hissa. ,,Þetta er ein af fáum slæmum ákvörðunum sem Klopp hefur tekið í nafni Liverpool, það er alveg eðlilegt að hann stilli ekki upp sínu besta liði en að hann ætli ekki að stýra liðinu, er allt annað og verra,“ skrifar Herbert.

,,Það virðast flestir átta sig á því að þegar þú ferð með lið inn í keppni, þá stýrir þú liðinu. Nema það séu aðstæður eins og í krngum HM félagsliða. Þetta er dómgreindarleysi.“

Tom Collomosse annar blaðamaður á Daily Mail var á sömu skoðun. ,,Klopp vissi reglurnar fyrir leikinn, ef hann vildi svo ólmur sleppa við annan leik þá átti hann að stilla upp sterkara liði. Hann er búinn að vinna deildina.“