Alfreð Finnbogason, framherji Augsburg spilaði sinn fyrsta leik í tvo og hálfan mánuð um helgina. Alfreð lék tæpt korter í tapi gegn Union Berlin, í þýsku úrvalsdeildinni. Freyr Alexandersson, aðstoðarlandsliðsþjálfari hafði rætt um endurkomu Alfreðs í viðtali við Fótbolta.net fyrr um daginn. Þar kom fram að Alfreð yrði ekki leikfær í bráð.
Alfreð meiddist á öxl í landsleik með Íslandi í nóvember en hann ætti að verða klár í slaginn í umspilinu um sæti á EM í mars, ef ekkert bakslag kemur.
Hjörvar Hafliðason og sérfræðingar hans ræddu þetta í Dr. Football í dag. ,,Það var verið að fjalla um undirbúninginn fyrir leikinn við Rúmeníu, það var afturhvarf til fortíðar í viðtali við Frey Alexandersson, sem ég hafði gaman af. Þegar hann var spurður út í hvað var að frétta af Alfreð Finnbogasyni, þetta minnti mig á þann tíma þegar ég var að byrja að fjalla um landsliðið upp úr aldarmótum,“ sagði Hjörvar og spilaði hljóðbút með ummælum Freys á laugardag.
,,Þetta gengur vel hjá Alfreð, það er ekki alveg á dagskrá að hann sé að fara að spila næsta leik en hann verður byrjaður að spila þegar umspilið á sér stað,“ sagði Freyr og mátti skilja hann að Alfreð myndi byrja að spila seint í febrúar eða í byrjun mars. Ljóst er að misskilningur hefur verið í samskiptum milli Augsburg og KSÍ, eða Alfreðs og KSÍ.
Hjörvar fór svo að ræða ummælin. ,,Þarna var sagt að hann spili alls ekki næsta leik en að hann verði klár 26 mars, svo að hlustendur Dr. Football átti sig á því, þá kom Alfreð inn gegn Union Berlin um helgina. Hann var hrikalega góður. Ég veit hversu all inn Freysi er, ég las það á miðlum Augsburg á föstudag að að hann væri að ferðast með liðinu.“
,,Þetta er spes, mjög spes,“ sagði Mikael Nikulásson, sérfræðingur þáttarins. ,,Þetta kemur mjög á óvart, hann fullyrðir að hann sé í raun ekki að fara að spila á næstunni. En verði klár í mars, það er janúar. Hann spilar þremur mínútum eftir viðtalið.“
Kristján Óli Sigurðsson, kallaði eftir betri heimavinnu frá þjálfarateymi landsliðsins. ,,Við höfum oft talað um heimavinnu, heimavinnu, heimavinnu. Þetta er eitthvað allt annað en heimavinna.“
