Frank Lampard, stjóri Chelsea, hefur staðfest hvaða leikmaður gæti verið á förum frá félaginu í janúar.
Lampard hefur útilokað tvær brottfarir en þeir Ross Barkley og Willian munu ekki kveðja félagið.
Framherjinn Olivier Giroud gæti þó farið en hann fær ekkert að spila þessa dagana.
,,Það er ekkert tal um að Ross Barkley sé að fara. Hann er okkar leikmaður og ég hef mikla trú á honum,“ sagði Lampard.
,,Olivier Giroud, það gæti eitthvað gerst þar. Hann er reynslumikill leikmaður og okkar samband er gott. Ef kringumstæðurnar eru réttar þá gæti eitthvað gerst.“
,,Willian er ekki að fara neitt. Samningur hans rennur út í sumar en hann er enn í viðræðum við félagið.“