Greint var frá því í gær að Hafnarfjarðabær ætlar á næstunni að hefja byggingu á nýju knatthúsi, við Ásvelli. Um er að ræða félagssvæði Hauka, óhætt er að segja að þessi ákvörðun bæjarins hafi vakið athygli og umræðu í sveitarfélaginu.

Hörður Magnússon, sem var í áraraðir einn fremsti íþróttafréttamaður þjóðarinnar er ekki ánægður með hvernig farið er með fjármuni bæjarins. Hörður er gallharður Hafnfirðingur og lék lengi vel með FH, erkifjendum Hauka.

,,Haukar að fá knatthús bara si svona. Heyrist lítið af mótmælum núna. Nýbúnir að fá körfuboltahús sem kostar svipað eða jafnvel meira en Skessan,“ skrifaði Hörður á Facebook síðu sína í gærkvöldi.

Hörður ræðir þar nýtt knatthús sem FH var að reisa, með fjárhagslegri hjálp frá bænum og nýtt körfuboltahús sem Haukar voru að fá. ,,Það hús (Körfuboltahúsið) átti upphaflega að kosta helmingi minna ef ég man rétt? FH-ingar voru blóðugir upp fyrir haus í 2 eða 3 ár að koma knatthúsi í gegn. Þrátt fyrir að vera með eina stærstu knattspyrnudeild landsins.“

Hörður segir að það halli verulega á FH þegar kemur að uppbyggingu á félagssvæði. ,,Óhætt að segja að skekkjan sé mikil. Líklega er best að fara á hausinn eins og Haukarnir gerðu eftirminnilega fyrir nokkrum árum. Velgengni í knattspyrnu í áratugi virðist vera aukaatriði. Trúlega er betra að geta ekki neitt falla um deildir og þá rísa byggingar.“