Það eru margir farnir að kannast við nafnið Patrick Mahomes en hann er leikmaður í bandarísku NFL-deildinni.
NFL-deildin á marga dygga aðdáendur hér á landi en Mahomes er leikstjórnandi Kansas City Chiefs.
Þar er Mahomes mjög mikilvægur hlekkur í liðinu en hann hefur leikið þar síðan 2017.
Mahomes 24 ára gamall en hann er kærasti Brittany Matthews sem einhverjir hér á landi kannast við. Þau hafa verið saman í mörg ár og voru í sama skóla í Bandaríkjunum.
Matthews er sjálf fyrrum leikmaður Aftureldingar í knattspyrnu hér heima en hún spilaði með liðinu árið 2017. Matthews lék fimm leiki og skoraði í þeim fimm mörk.
Það eru fáir sem vissu af þeirra sambandi en stórstjarnan Mahomes ferðaðist með Matthews til landsins til að byrja með.
,,Ég fékk tækifæri á að reyna fyrir mér á Íslandi og ég gat aldrei hafnað því að fá að gera það sem ég elska,“ sagði Matthews um tímann á Íslandi.
Hún hefur einnig gert það gríðarlega gott í viðskiptum og byrjaði fyrirtækið Brittany Lynne Fitness árið 2019.
Það fyrirtæki hefur farið mjög vel af stað en Matthews útskrifaðist með gráðu í vöðva- og hreyfisfræði sama ár og nýtti hana til fulls.
Instagram síða Matthews er með 233 þúsund fylgjendur en hún er dugleg að ráðleggja sínum aðdáendum um hreyfingu og mataræði. Þar má einnig sjá ófáar myndir af parinu saman.
Þau búa nú saman í Kansas en Bleacher Report tók stutt viðtal við parið í ágúst á síðasta ári sem fékk yfir 800 þúsund áhorf.
Parið keypti rándýrt hús í Kansas á síðasta ári sem er verðsett á nálægt tvær milljónir bandaríkjadala.
Þau eiga einnig tvo hunda saman þá Steel og Silver. Steel var valentínusargjöf Mahomes til Matthews árið 2016.
