Rúnar Már Sigurjónsson, leikur með Astana í Kazakhstan þar sem gríðarleg stéttaskipting er í gangi. Miðjumaðurinn knái hefur gert það gott þar í landi.

Rúnar býr í höfuðborginni þar sem Astana spilar en hann segir landið afar stéttaskipt, þegar liðið ferðast um landið kemur ýmislegt upp úr krafsinu. Margir eru afar ríkir en fjöldi fólks glímir við mikla fátækt.

,,Þú lendir í öllu, þú færð allt það besta. Við vorum í flugi um daginn og lentum bara á túni, svo er þér bara rétt taskan út úr vélinni,“ sagði Rúnar í hlaðvarpsþættinum, FantasyGandalf.

Hugi Halldórsson og Ingimar Helgi sem stýra þættinum voru ekki alveg að skilja hlutina, lenti Rúnar bara úti á túni?

,,Við lentum bara á túni, við keyrðum á túninu í fimm mínútur, keyrðum svo á mold og svo var bara smá malbik fyrir utan flugstöðina. Þér var bara rétt taskan yfir eitthvað borð, það er bara gaman. Ólíkir menningarheimar þarna, aðalatriðið er að vera undirbúinn undir allt.“

,,Einn félagi minn, sagði að þetta héti neyðarlending annars staðar. Þarna er þetta eðlilegt, þetta er flugvöllurinn.“