Charlie Austin, framherji West Brom á Englandi var á Íslandi fyrir áramót þar sem hann naut lífsins. Hann segir frá ferðalaginu í samtali við heimasíðu félagsins.

Austin var þó hræddur þegar hann var að lenda í Reykjavík en Bianca, eiginkona hans vildi fara til Íslands. Þau voru hér á landi í nóvember.

,,Ég vil alltaf fara í sól, alltaf vel ég Dubai, Þar er sól, í síðasta landsleikjafríi þá vildi Bianca fara til Íslands. Ég sagði það væri í lagi, ef það myndi klikka þá væri það hennar sök,“ sagði Austin.

,,Það byrjaði ekki vel, ég er stundum hræddur við að fljúga og sérstaklega í smá ókyrrð. Þegar við vorum að lenda í Reykjavík, þá hristist vélin hressilega. Þegar við lentum var okkur tjáð að þetta hefði ekki mátt vera mikið meira, þá hefði vélin ekki getað lent. Þetta byrjaði ekki vel.“

Hann segist svo hafa lent í annari martröð. ,,Martröð hvers knattspyrnumanns er að lenda á hóteli og sjá annan knattspyrnumann. Ég hafði ekki verið þarna í meira en fimm mínútur þegar Lewis Cook, hjá Bournemouth var mættur á barinn.“

,,Eftir það var þetta frábært, við gerðum allt sem túristar gera þarna. Fórum á snjósleða upp á jökul, það var magnað. Ekki segja West Brom frá því, ég hefði getað brotið hvaða bein sem er þar. Við eyddum þremur kvöldum í röð um að finna Norðurljósin, en það var of mikil þoka. Þetta var frábær ferð, Bianca fær hrós fyrir hana.“