Emil Hallfreðsson hefur skrifað undir hjá Calcio Padova á Ítalíu. Hann gerir samning út leiktíðina. Emil hefur verið án félags síðan í sumar, þegar samningur hans við Udinese rann út. Hann hefur síðan þá æft með FH.

Emil hefur beðið eftir rétta tilboðinu en það hefur látið á sér standa, hann skoðaði aðstæður hjá Padova á dögunum. Padova er í fjórða sæti í Seriu-C og á fínan möguleika á að komast upp. Emil er 35 ára og hefur spilað á Ítalíu frá 2010.

,,Ég talaði við þjálfarann, ég var án félags í 5-6 mánuði. Ég vildi spila og komast aftur í leikinn, þetta kom upp fyrir jólin,“ sagði Emil þegar hann var kynntur til leiks á Ítalíu í dag.

,,Ég spilaði þrjá landsleiki í haust og lék þrjá æfingaleiki með FH, stærsta liðinu á Íslandi. Margir hafa talað um að ég væri hættur, eftir meiðsli sem komu upp fyrir ári síðan. Það er ekki þannig, ég vil sanna mig aftur. Udinese kom vel fram við mig, þeir vildu fá mig aftur eftir Frosinone tímann.“

,,Ég hef metnað til að sanna ágæti mitt, vonandi getum við náð markmiðinu. Ég hef séð einn leik og veit ekki mikið um Seriu C í dag, ég var hérna fyrir tíu árum með Verona. Fjölskylda mín kemur með mér.“