Mino Raiola, umboðsmaður Paul Pogba segir að leikmaðurinn vilji á næstu leiktíð vera í félagi sem er að berjast um titla. Pogba hefur viljað fara frá United síðustu mánuði.

Raiola er umdeildur umboðsmaður hjá United, Sir Alex Ferguson hataði Raiola og það hefur smitað sér í samskiptum hans við félagið og stuðningsmenn.

,,Ég get sagt hvar ég vona að hann verði, ég vona að hann verði í liði sem er að berjast um sigur í deild og í Meistaradeildinni,“ sagði Raiola.

,,Er það skrýtið? Er ég sá eini sem hef áhyggjur af United? Hefur eigandinn áhyggjur? Ég held að allir sem elska United hafi áhyggjur.“

,,Ég hef áhyggjur af þessu út af leikmanni mínum, svo lengi sem Paul er hjá United þá vill hann vinna titla þar. Hann er þannig leikmaður, félagið er ekki þar það sem það telur sig eiga að vera.“