Leikmenn Chelsea rifust í búningsklefanum í gær er liðið var 1-0 undir gegn Arsenal á Emirates.

Þetta segir Frank Lampard, stjóri liðsins, en frammistaða Chelsea í fyrri hálfleik var ekki góð.

Allt annað lið mætti til leiks í seinni hálfleik og unnu þeir bláklæddu að lokum 2-1 útisigur.

,,Mér líkar við það að menn hafi látið heyra í sér, ég vil ekki 11 hljóðláta leikmenn sem sætta sig bara við þetta og skokka út,“ sagði Lampard.

,,Ég sagði mitt og ég var ansi skýr því þú getur ekki komið hingað og boðið upp á ekkert og náð í úrslit.“

,,Strákarnir byrjuðu svo að tala sín á milli og þeir voru ákafir sem er mjög góður hlutur.“