Paul Merson, fyrrum leikmaður Arsenal, vill ekki sjá Mikel Arteta taka við liðinu eins og talað er um.

Arteta er sterklega orðaður við starfið en hann hefur undanfarin ár verið aðstoðarmaður Pep Guardiola hjá Manchester City.

Arteta hefur þó aldrei verið aðalþjálfari en hann er einnig fyrrum leikmaður Arsenal.

,,Það er flott að benda á það að hann hafi unnið með Pep Guardiola en við þurfum að vera hreinskilin,“ sagði Merson.

,,Guardiola væri í vandræðum með þetta Arsenal lið. Bæði Guardiola og Jurgen Klopp.“

,,Það er hægt að loka á það að Arteta geti spilað sama fótbolta og Guardiola á Emirates þegar þú horfir á leikmennina sem hann vinnur með.“