,,Það var fundað hjá KA, þegar Samherjamálið kom upp,“ sagði Elvar Geir Magnússon, ritstjóri Fótbolta.net í hlaðvarpsþætti sem vefsíðan birti í dag.

Lengi hefur verið talað um að Samherji sé langstærsti, styrktaraðili KA. Tómas Þór Þórðarson, sérfræðingur þáttarins staðfesti að þessi fundur hefði átt sér stað. Félagið hefur áhyggjur að ef illa fer hjá Samherja, verði styrkir til KA minni en áður.

Samherjamálið er mál sem hefur verið á allra vörum, Samherji hefur verið sakaður um að greiða mútur í Namibíu. Málið er til rannsóknar hjá yfirvöldum.

Samherji er eitt stærsta fyrirtæki landsins og hefur styrkt starf KA, um langt skeið. KA er í Pepsi Max-deild karla og minni styrkur frá Samherja, hefði áhrif á liðið. KA hefur síðustu ár getað fengið til sín leikmenn sem stærstu félög landsins hafa viljað, félagið hefur getað borgað góð laun.

,,Það er ekki hægt að segja hvernig þetta Samherjamál fer,“ sagði Tómas Þór og talaði um að ef allt færi á besta veg, gæti KA styrkt sig þegar líður að móti.