Breiðablik er að selja Kristian Nökkva Hlynsson til Ajax á metfé. Þetta kom fram í hlaðvarpsþættinum, Dr. Football.

Kristian, sem er fæddur árið 2004, er sóknarsinnaður leikmaður sem nýtur sín best fremstur á miðju. Kristian hefur staðið sig afar vel bæði með Blikum sem og yngri landsliðum Íslands þar sem hann hefur spilað upp fyrir sig. Í sumar fór Kristian með 3.flokki karla til Hollands á elítumót og var þar valinn besti leikmaður mótsins af mótshöldurum. Ajax kom auga á hann þar.

Kristján Óli Sigurðsson, sérfræðingur þáttarins sagði að Ajax ætlaði sér að greiða metfé fyrir ungan leikmann frá Íslandi, til að tryggja sér starfskrafta hans.

Þá kom fram að Breiðablik hefði áhuga á Brynjari Atla Bragasyni, markverði Njarðvíkur. Þetta staðfesti Mikael Nikulásson, þjálfari liðsins. Mikael sagði að fleiri félög hefðu áhuga á markverðinum, sem verður tvítugur á næsta ári.

Fyrir er Breiðablik með Gunnleif Gunnleifsson og Anton Ara Einarsson en líklega yrði Brynjar lánaður út í eitt ár.