,,Það rigndi yfir okkur tölvupóstum og skilaboðum á föstudag og laugardag, að leikmenn FH ætluðu í verkfall í leiknum gegn KR á laugardag. Vegna umræðu sem þið þekkið, það reyndist vera algjört bull. Mættu bara með nýjan geggjaðan leikmann, Emil Hallfreðsson,“ sagði Hjörvar Hafliðason, stjórnandi Dr. Football í þætti sínum í dag.

Endalausar sögur virðast koma úr Kaplakrika ef marka má umræðuna sem verið hefur síðustu vikur, mikið af þeim virðast vera langt frá sannleikanum.

,,Ég heyrði fleiri sögur að þeir væru í verkfalli, að þeir mættu ekki á æfingar en mættu í leiki. Þetta er þeirra að leysa, góðar fréttir úr Krikanum. Þeirra aðalmaður kemur með endurkomu í janúar, Jón Rúnar Halldórsson ætlar aftur í stjórn í janúar,“ sagði Kristján Óli Sigurðsson, sérfræðingur þáttarins.

Mikael Nikulásson sagði að umræðan um FH væri þreytt, augljóst væri að margir væru að búa til hluti, til að búa til meiri umræðu. Sögur um verkfall og peningavandræði félagsins, væru stórlega ýktar.

,,Það eru endalausar sögur, er þetta ekki orðið frekar þreytt. Verkfall í sumar, var ekkert verkfall. Verkfall á laugardaginn, ekkert verkfall. Núna eru menn bara byrjaðir að búa til sögurnar um FH. Til að hafa eitthvað til að tala um, þeir voru með ágætis lið á móti KR á laugardag. Þeir voru á æfingu á föstudaginn, ég held að menn ættu að fara að slaka á. Þetta er orðið þreytt.“

Mikael segir að þetta sé komið gott. ,,Ég er að tala hreina íslensku, endalaust að tala um eitthvað sem stenst ekkert. Voðalega þreytt. Það getur vel verið að einhver eigi inni laun, þeir eru að æfa og spila eins og önnur lið.“