Eiður Smári Guðjohnsen er af mörgum talinn besti knattspyrnumaður Íslands frá upphafi og það er góð ástæða fyrir því.

Eiður er hættur í dag eftir farsælan feril og vinnur og býr hér heima. Hann bjó áður víðsvegar í Evrópu og meðal annars í Barcelona.

Hann var gestur í spjallþætti Loga Bergmanns Eiðssonar í gær og fóru þeir félagarnir yfir ýmis mál.

Eiður viðurkennir að hann eigi erfitt með að búa á Íslandi eftir að hafa kynnst hitanum í öðrum löndum.

,,Ég á ekki auðvelt með að vera á Íslandi, ég sá ekki fyrir mér að ég myndi búa hérna. Það hefur verið smá pakki að eiga við það, ég átti mjög erfitt með fyrsta veturinn,“ sagði Eiður.

,,Myrkrið og kuldinn, ég er ekki kuldaskræfa. Þá finnst mér lífið á Íslandi ekkert sérstaklega auðvelt. Ég sakna útiveru á Spáni, ég er ekki mikið fyrir að fara á fjöll. Bara að sitja úti.“

Eiður bjó einnig lengi í London og kom við í Monaco og Belgíu síðar á ferlinum.