„Tyrkir hafa gert mjög vel í þessari undankeppni, náð fjórum stigum gegn Frökkum sem hefur komið okkur í erfiða stöðu. Vonandi verður ekki partý í Istanbúl á morgun og við munum gera okkar besta til að tryggja að það gerist ekki,“ sagði Kári Árnason, varnarmaður Íslands, á blaðamannafundi fyrir leikinn gegn Tyrkjum á morgun.

Kári sat fyrir svörum ásamt landsliðsþjálfaranum Erik Hamrén.

Kári sagði að íslenska liðið myndi nálgast þennan leik eins og alla aðra. Það væri enginn að velta fyrir sér mikilvægi leiksins fyrir Tyrki eða þeirri staðreynd að leikurinn fer fram í einhverri mestu ljónagryfju fótboltans.

„Þetta er bara eins og hver annar leikur. Andrúmsloftið er ógnvekjandi, völlurinn er frábær og frábærir stuðningsmenn. Það breytir engu um markmið okkar. Við erum hingað komnir til að vinna,“ sagði Kári en bætti við að Ísland væri vissulega upp við vegg.
„Þeir þurfa bara eitt stig og hafa tvö tækifæri til að ná í þau en við höfum eitt tækifæri til að vinna tvo leiki. Líkurnar eru á móti okkur en við höfum ekki gefist upp.“