Raheem Sterling, leikmaður Manchester City, verður ekki með enska landsliðinu í undankeppni EM á fimmtudag. Þetta var staðfest í gær en Gareth Southgate, landsliðsþjálfari, gaf frá sér stutt skilaboð. Þessar fregnir voru staðfestar stuttu eftir að greint var frá heiftarlegu rifrildi Sterling við Joe Gomez á æfingu enska liðsins.

Sterling og Gomez höfðu átt í átökum á sunnudag þegar Liverpool vann góðan sigur á Manchester City. Ensk blöð segja að Gomez og Sterling hafi skipst á orðum í matsal enska landsliðsins. Sterling varð afar reiður og reyndi að taka Gomez hálstaki, áður en stigið var á milli þeirra.

Sky Sports segir að Sterling hafi labbað inn í matsalinn og þá hafi Gomez og aðrir verið að hlæja. Sterling tók því illa og sagði við Gomez. ,,Heldur þú að þú sért orðinn stór strákur núna,“ sagði Sterling. Allir héldu að um „banter“ eins og Englendingar segja, væri að ræða.

Sterling labbaði svo að Gomez og reyndi að grípa um háls Gomez. Varnarmaður Liverpool varð afar reiður og voru leikmenn fljótir á milli þeirra.

Jordan Henderson, fyrirliði Liverpool fékk þá svo til að hittast skömmu síðar þar sem málið var leyst.