Pep Guardiola, stjóri Manchester City, segir að það sé ekki til erfiðari útivöllur en Anfield.

Liverpool spilar heimaleiki sína á Anfield og fær City í heimsókn á morgun í ensku úrvalsdeildinni.

,,Ég elska að spila þarna. Mér líkaði ekki við það sem gerðist í rútunni fyrir utan en inni á vellinum þegar þeir styðja liðið sitt þá er það fullkomið,“ sagði Guardiola.

,,Það er ástæðan fyrir því að við erum að þessu, við viljum upplifa þetta á svona leikvöngum.“

,,Þeir eru frábært lið og völlurinn skiptir sköpum. Ég myndi segja að það sé erfiðast að ferðast þangað í allri Evrópu.“