Það er nýr maður sem ræður í græna hluta Kópavogs, Óskar Hrafn Þorvaldsson var ráðinn þjálfari Breiðabliks á dögunum. Hann hefur hafið störf og æfingar eru farnar af stað.

Árangur Óskar með Gróttu var magnaður, hugmyndafræði hans var á hreinu með liðið. Hann vildi spila ungum leikmönnum og spila sóknarsinnaðan leik, þar sem mikið er lagt upp úr því að spila boltanum úr vörninni og þar fram eftir götunum.

Óskar hefur nægan efnivið í Smáranum til að vinna með, hann ku svo reyna að fá bestu ungu leikmenn landsins til félagsins. Þannig bendir allt til þess að unglingalandsliðsmaðurinn, Róbert Orri Þorkelsson gangi í raðir Breiðabliks. Hann hefur gert það gott með Aftureldingu.

Anton Ari Einarsson er mættur í Kópavoginn frá Val og berst við Gunnleif Gunnleifsson um markvarðarstöðuna. Óvíst er hvað verður um Höskuld Gunnlaugsson og Alfons Sampsted, báðir voru á láni á liðnu tímabili en eru á mála hjá liðum í Svíþjóð.

Þá fór Andri Rafn Yeoman í nám á Ítalíu og ekki er öruggt hvort eða hvernig þáttaka hans verður á næstu leiktíð.

Viktor Kar Einarsson gæti spilað stærra hlutverk en á liðnu tímabili og Karl Friðleifur Gunnarsson, ungur hægri bakvörður gæti fengið stærri rullu.

Óskar spilaði mest 3-4-3 kerfið með Gróttu og gæti gert það áfram hjá Blikum. Gæti þetta orðið liðið sem Óskar Hrafn stillir fram á næstu leiktíð?