„Á 3 mínútna fundi var mér fyrirvaralaust sagt upp störfum eftir tæplega 20 ár,“ segir Hörður Magnússon sem var sagt upp störfum hjá Sýn í dag eftir tuttugu ára starf hjá fyrirtækinu.

Sjá einnig: Herði sagt upp hjá Sýn: Hafði starfað þar í 19 ár

Eins og DV greindi frá var þessum ástsæla og vinsæla íþróttafréttamanni sagt upp störfum í morgun og kom uppsögnin vinnufélögum Harðar á óvart, að því er heimildir DV herma.

Hörður tjáir sig um brottreksturinn í færslu á Facebook-síðu sinni. Þar segir hann:

„Mitt líf hefur verið uppfullt oft á tíðum af óvæntum beygjum. Ein slík hrikti undir mínum stoðum í morgun. Á 3 mínútna fundi var mér fyrirvaralaust sagt upp störfum eftir tæplega 20 ár. Hef reynt að vinna af heilindum og samviskusemi alla tíð. Vænst þykir mér að hafa kynnst mörgu frábæru fólki í gegnum tíðina. Ég hef verið heill þrátt fyrir atvinnutilboð annars staðar frá. Pepsi Mörkin voru ekki bara vinna. Þau standa mér næst. Í 9 ár án þess að missa úr þátt þá er það mest sem ég er stoltur af. Lýsingar á vettvangi í Moskvu Wembley, og Munchen eru eftirminnilegar sem og HM 2006. Ég kveð með söknuði. En það skyldi engan afskrifa mig. Góðar stundir.“