Peter Crouch, fyrrum leikmaður Liverpool, telur sig vita af hverju Xherdan Shaqiri fær ekki að spila hjá félaginu.

Shaqiri fær engar mínútur þessa stundina en Crouch telur að Jurgen Klopp treysti vængmanninum ekki.

,,Það kom mér ekki á óvart þegar Liverpool samdi við hann því hann er einn sá hæfileikaríkasti sem ég hef unnið með,“ sagði Crouch sem lék með Shaqiri hjá Stoke.

,,Hann getur gert gæfumuninn. Vandamálið hjá Stoke var að hann getur á tímum litið frábærlega út en svo komu tímar þar sem aginn var enginn.“

,,Þú spilar ákveðið hlutverk og þarft að elta til baka, að gera þitt eigið virkar ekki. Ég held að það gangi ekki hjá honum og Klopp.“

,,Ef hann getur ekki treyst þér 100 prósent þá spilar hann þér ekki. Það tekur þó ekki hæfileikana frá Shaqiri.“