Stjórn knattspyrnufélags Gróttu sendi frá sér tilkynningu í kvöld vegna þjálfarans Óskars Hrafns þorvaldssonar.

Óskar er sterklega orðaður við Breiðablik þessa stundina en hann kom Gróttu upp í efstu deild í sumar.

Óskar hefur náð mögnuðum árangri með Gróttu liðið og er óvíst hvort hann verði áfram.

Það er hins vegar ekki rétt að Óskar sé búinn að skrifa undir hjá Blikum eins og kemur fram í tilkynningu félagsins.

Þar er greint frá því að framtíðin verði rædd í lok vikunnar eins og hefur staðið til í langan tíma.

Tilkynning Gróttu:

Undanfarna daga hefur mikil umræða skapast um afrek meistaraflokks karla í knattspyrnu, þegar liðið sigraði Inkasso-deildina 2019 og tryggði sér sæti meðal þeirra bestu í Pepsi Max-deildinni í fyrsta sinn í sögu Gróttu.

Það er nýtt fyrir knattspyrnudeild Gróttu að vera í hringiðu slíkrar umræðu, sem á sér margar hliðar. Þannig hefur til dæmis verið töluvert skrafað um framtíð okkar ástsæla aðalþjálfara, Óskars Hrafns Þorvaldssonar. Í tilefni af þessari umræðu viljum við árétta við Gróttufólk og alla aðra sem hafa sýnt okkur velvild og fylgst með okkur, að leikmenn og þjálfarar eru í verðskulduðu fríi um þessar mundir. Ekkert hefur breyst í þeirra málum gagnvart félaginu síðustu daga. Til hefur staðið að stjórn og þjálfarar hittist og ræði framtíðina í lok vikunnar. Þetta stendur óbreytt.

Við erum óendanlega stolt af drengjunum í liðinu, þakklát fyrir einstakt framlag þjálfara þess og hlökkum til að takast á við þær áskoranir sem bíða félagsins.