Pape Mamadou Faye, knattspyrnumaður ræðir opinskátt um kynþáttafordóma á Íslandi við Mannlíf. Pape er í ítarlegu viðtali en hann hefur spilað fyrir Fylki, Víking Ólafsvík og fleiri lið. Í dag spilar hann fyrir Þrótt Vogum.
Pape kom til landsins ellefu ára gamall frá Senegal, hann hefur rætt reglulega um fordóma sem eiga sér stað á Íslandi. Þegar Pape kom til Íslands mættu honum fordómar um leið. „Ég hafði alltaf haft mikinn áhuga á fótbolta og spilað mikið en þegar ég kom í Austurbæjarskóla gengu allir út frá því að ég væri körfuboltamaður. Það var bara viðtekin hugmynd á Íslandi á þeim tíma að allir svartir menn væru körfuboltamenn,“ segir Pape við Mannlíf.
Hann byrjaði á að fara á fótboltaæfingu hjá Val en þar voru fordómar. „Fótboltinn var alltaf fyrsti kosturinn hjá mér. Ég byrjaði hins vegar ekki að æfa hann á fullu fyrr en ég flutti í Árbæinn sex mánuðum eftir að ég kom til landsins. Ég fór á eina æfingu hjá Val þegar ég var nýkominn en lenti hjá fordómafullum þjálfara sem vildi ekki dökkan strák í liðið sitt svo ég fór aldrei þangað aftur.“
Hjá Fylki náð Pape flottum árangri en foreldrar leikmanna voru oftar en ekki með fordóma í hans garð. „Það var oft vesen út af þessu á þeim tíma. Ég og annar dökkur strákur, sem er kominn í A-landsliðið núna, fengum alveg að heyra það frá foreldrunum sem kölluðu okkur n-orðinu og fleiri niðrandi orðum sem voru mjög særandi.“
Svaf illa eftir ummæli Björgvins:
Í sumar var Björgvin Stefánsson, framherji KR dæmdur í bann vegna ummæla sem hann lét falla. Hann sagði stutt vera í villimannseðlið hjá svörtu fólki. Ummælin fóru mjög illa í Pape ,,Ég hef upplifað að margir trúa mér ekki. Halda því blákalt fram að svona hlutir gerist ekki á Íslandi. Mér finnst mjög undarlegt að fólk sem aldrei hefur lent í neinu svona taki þá afstöðu, hvers vegna ætti ég að vera að ljúga þessu? Þetta viðhorf er svo hættulegt. Það kom svo vel í ljós í þessu atviki með Björgvin í sumar, það voru nánast allir tilbúnir til að verja hann og gera lítið úr þessum ummælum, en þetta hafði mikil áhrif á mig og ég átti erfitt með svefn þetta kvöld. Ég varð reiður, ég viðurkenni það, og enn reiðari vegna viðbragðanna. Það virtist öllum finnast þetta allt í lagi.““
Óttast að eiga barn á Íslandi
Pape er farið að langa að eignast barn en er hræddur við umhverfið á Íslandi. ,,Nú er ég kominn á þann aldur að mig langar til að eignast barn en ég hræðist það. Ég vil ekki að barnið mitt lendi í þessu ógeði og ég sé ekki fram á að þetta breytist neitt.“
