Það kom á óvart en samt ekki þegar Breiðablik tilkynnti í gær að búið væri að reka Ágúst Gylfason úr starfi, sem þjálfara karlaliðs félagsins. Tíðindin koma á óvart þegar árangur hans í starfi er skoðaður, sögusagnir um að hann yrði rekinn hafa hins vegar verið á lofti í fleiri vikur, sökum þess koma tíðindin ekki á óvart.
Ágúst er að klára sitt annað tímabil með Blikum, hann lætur af störfum eftir leikinn gegn KR á laugardag. Ágúst hefur tryggt Blikum, annað sætið í Pepsi Max-deildinni, tvö ár í röð. Stöðugleiki í Kópavogi en leikmenn og stjórn vildu meira.
Mörgum þykir illa fari með Ágúst þarna, Blikar vildu vinna titil í ár en saga félagsins í karlaflokki er ekki slík að hægt sé að krefjast þess. Þannig hefur félagið aðeins tvisvar unnið titil í karlaflokki, það var árið 2009 og 2010 undir stjórn Ólafs Kristjánssonar.
Blikar telja hins vegar að til að liðið taki næsta skref í átt að titli, sé Ágúst ekki fær um að fara með félagið þangað en hvaða ástæður eru fyrir því?
Leikplan undir stjórn Ágústar
Samkvæmt heimildum 433.is eru bæði leikmenn og þeir sem standa í kringum félagið, á því að taktísk hæfni Ágústar hafi verið ábótavant, lítið leikplan hafi verið í gangi. Leikmenn og fólk í kringum liðið telja að með þennan mannskap eigi liðið ekki að vera 11 stigum á eftir Íslandsmeisturum, KR.
Sækja eldri menn sem gerðu lítið
Samkvæmt heimildum 433.is er líka ósætti með það innan Breiðabliks að Ágúst hafi sótt eldri leikmenn sem lítið hafa gert fyrir liðið. Breiðablik er með mikið magn af efnilegum piltum og sú staðreynd að Ágúst sótti Þórir Guðjónsson, Guðmund Böðvar Guðjónsson og Arnar Svein Geirsson, hefur ekki farið vel í alla. Þeir sem starfa í kringum liðið telja að þeir hafi litlu við bætt, frekar hefði átt að brúka unga og efnilega leikmenn félagsins. Í þessu tilviki hefði mátt nota nokkrar miljónir á ári í annað, fremur en eldri menn sem litlu hafa bætt við.
Halda öllum góðum og agaleysi
Samkvæmt heimildum 433.is hefur það búið til pirring í leikmannahópi Breiðabliks að Ágúst hefur viljað halda öllum góðum, hann hefur reynt að gefa öllum tækifæri í byrjunarliðinu sama hvort það gangi vel eða illa. Leikmenn liðsins tala um að það hafi vantað að finna besta byrjunarliðið og keyra á því, stöðuleiki í stuttu Íslandsmóti getur verið stór lykill að árangri. Með þessu er Ágúst sagður hafa viljað halda öllum góðum. Þá er talað um hálfgert agaleysi, sumir leikmenn fá að fara langt yfir það sem telst eðlilegt, án þess að þeim sé refsað fyrir.
En vann ekki Ágúst bara kraftaverk?
Frá því að Ágúst tók til starfa hefur félagið selt út haug af leikmönnum, bara frá því að þetta tímabil hófst hefur stjórn Breiðabliks selt þrjá lykilmenn. Jonathan Hendricx, Aron Bjarnason og Kolbeinn Þórðarson hafa farið frá því að tímabilið hófst. Ofan á bætist að Davíð Kristján Ólafsson, Willum Þór Willumsson, Oliver Sigurjónsson og Gísli Eyjólfsson fóru eftir síðustu leiktíð en Gísli snéri aftur um mitt sumar.
Það má því færa góð rök fyrir því að Ágúst hafi unnið hálfgert kraftaverk að halda sjó með liðið, þrír lykilmenn teknir frá honum á miðju sumri þegar liðið gat orðið Íslandsmeistari. Ekki hefur tekist að ná í Ágúst í morgun til að fara yfir málið, þrátt fyrir ítrekaðar tilraunir.
Ágúst er nú orðaður við þjálfarastarfið hjá Val, ásamt Heimi Guðjónssyni. Þar var hann áður leikmaður og þekkir félagið út og inn.
