Vincent Kompany er farinn frá Manchester City en hann hefur gert samning við Anderlecht í Belgíu.
Kompany er goðsögn hjá City en hann lék með liðinu í mörg ár og vann ófáa titla í Manchester.
Oleksandr Zinchenko, leikmaður City, mun sakna Kompany mikið og fór að gráta er hann heyrði af því að Kompany væri á förum.
,,Ég fór að gráta. Vincent er goðsögn og ég er svo heppinn að hafa spilað með honum,“ sagði Zinchenko.
,,Getur hann orðið góður stjóri einn daginn, af hverju ekki? Hann gæti það því hann er gáfaðasti maður sem ég þekki.“
,,Vincent hjálpaði mér mikið á síðustu leiktíð, bæði á velli og fyrir utan. Hann kenndi mér að spila vinstri bakvörð og var stundum lengur með mér á æfingasvæðinu.“
