Það voru fjörugar umræður í Dr. Football í dag, líkt og svo oft áður. Þar var rætt um fréttafluttning RÚV af leik KA og HK í Pepsi Max-deild karla. Einar Örn Jónsson, íþróttafréttamaður á RÚV sagði þá að KA hefði unnið 1-0 sigur.

Emil Atlason jafnaði hins vegar leikinn í uppbótartíma fyrir HK en Hjörvar Hafliðason, harður HK-ingur. Tók málið upp í þætti dagsins.

,,Fyrir tíu árum hefði Hafliðason orðið brjálaður, hann segir 1-0 og þar við sat. Ég hitti nokkra HK-inga sem héldu að HK hefði tapað, þeir tóku bara tax payers money fréttirnar á þetta. Héldu að leikurinn hefði farið svona,“ sagði Hjörvar, sjálfur Dr. Football.

Hjörvar er duglegur að flagga spjöldum í þættinum en Einar Örn fær það ekki.

,,Ég veit að Einar Örn er meistari, þetta var ansi mikið sem þurfti að leiðrétta eftir þessa frétt. Ég ætla ekki að gefa Einari gult spjald, ég ætla að gefa honum knús. Ég veit að hann gerir ekki þessi mistök aftur, þetta var klukkutíma eftir leik sem þessar fréttir voru.“

Mikael Nikulásson var ögn harðari sinni í nálgun og fór beint í spjald. ,,Auðvitað er þetta spjald á hann, Einar er lang besti íþróttafréttamaðurinn á RÚV. Ég get ekki sett rautt á hann, þá væri lítið eftir. Ef ég væri yfirmaður á RÚV, þá væri hann á fundi núna. Hann er lang besti íþróttafréttamaðurinn á RÚV.“