Sadio Mane, leikmaður Liverpool, er búinn að fá nóg af samherja sínum hjá félaginu, Mohamed Salah.

Þetta segir fyrrum framherjinn Ian Wright en Mane brjálaðist í leik gegn Burnley um helgina.

Salah neitaði að gefa boltann á Mane í vítateig Burnley en sá síðarnefndi var í frábærri stöðu og gat skorað.

Wright segir að það sé skrítið að Mane sé orðinn svo pirraður snemma og að eitthvað meira sé á bakvið pirringinn en þetta eina dæmi.

,,Að hann hafi orðið svona reiður eftir aðeins fjóra leiki þýðir að þetta sé of djúpt,“ sagði Wright.

,,Hann varð alltof reiður og alltof snemma. Við sýndum það aðeins í Match of the Day í gær en það voru bara nokkrar klippur.“

,,Ég held að þetta gerist í mörgum leikjum, ég hef séð það. Ég hef horft á leiki þar sem hann getur auðveldlega gefið boltann.“

,,Sem framherji, hefði ég gefið boltann á hann? Ég vona það. Hann var svo reiður, hann var öskuillur.“

,,Þetta var: ‘ég er búinn að fá nóg’ augnablik. Við sáum það á bekknum gegn Burnley.“

,,Hann hefur fengið nóg af þessari stöðu þar sem hann getur potað boltanum inn en fær ekki tækifæri til þess.“