Arnar Gunnlaugsson, þjálfari Víkings R, var ánægður með sína menn í kvöld eftir sigur á Blikum.

Víkingar spiluðu frábæran leik gegn þeim grænu í kvöld en liðið vann 3-1 sigur og spilar við FH í úrslitum.

,,Hvað heldur þú? Geggjað, þetta var mjög sterkur fyrri hálfleikur sem skóp þennan sigur. Við fengum fá færi á okkur en fyrri hálfleikur var frábær og ég er hrikalega stoltur af strákunum gegn sterku liði Blika,“ sagði Arnar við Stöð 2 Sport.

,,Við komum þeim á óvart með þessu kerfi sem er lítið spilað hér heima. Við æfðum þetta vel og við skildum sálina efti rá vellinum. Það er gott að komast í úrslit eftir 50 ár eða eitthvað.“

,,Þetta er góð blanda af leikmönnum og hún er farin að minna mig á Skagann þegar við tvíburarnir vorum að koma upp.“

,,Þar voru eldri reynslumeiri menn sem tóku okkur undir þeirra væng og gerðu okkur að mönnum eins og Sölvi og Kári og þeir eldri gera.“

,,Þessi aukaspyrna, Jesús almáttugur. Þegar þú ert með svona leikmenn, þeir eru með x factor eins og Guðmundur Andri og Óttar. Hann [Óttar] hefur verið frábær síðan hann kom. Hann er mjög vandað eintak. Ég væri til í að ættleiða hann.“