Stjarnan fær nær ómögulegt verkefni í Evrópudeildinni eftir sigur á Levadia Tallinn í síðustu umferð.

Stjarnan komst áfram á dramatískan hátt í gær en Brynjar Gauti Guðjónsson skoraði þá fyrir liðið í blálokin í Eistlandi og Garðbæingar áfram á útivallarmarki.

Stjarnan spilar við lið Espanyol í næstu umferð keppninnar en það lið endaði í efri hluta spænsku úrvalsdeildarinnar í vor.

Espanyol á marga trygga stuðningsmenn og leikur liðið á RCDE vellinum sem tekur 40 þúsund manns í sæti.

Espanyol sendi skilaboð á Stjörnuna á Twitter í gær og bauð liðið velkomið á völlinn næsta fimmtudag.

Stjarnan svaraði á skemmtilegan hátt: ‘Já, verið þið síðan velkomnir á Samsungvöllinn í Garðabæ!“

Það er gríðarlega mikill gæðamunur á þessum liðum en ævintýri Stjörnunnar í Evrópu heldur áfram.

Já, verið þið síðan velkomnir á Samsungvöllinn í Garðabæ! https://t.co/ujwdxMqNfC

— Stjarnan FC (@FCStjarnan) 18 July 2019