Hlaðvarpsþátturinn Steve Dagskrá er efni sem við mælum sterklega með en þar er farið yfir knattspyrnu á mjög skemmtilegan hátt.

Þátturinn er í umsjón Andra Gunnarssonar og Vilhjálms Freys en þeir ræða knattspyrnu í þættinum sem er yfirleitt vikulega.

Í nýjast þætti þeirra var þjálfarinn Pedro Hipolito ræddur en hann var látinn fara frá ÍBV á dögunum.

Pedro er mjög umdeildur hér á landi en hann stýrði áður Fram í næst efstu deild. Þar var gengið brösugt en hann fékk samt sem áður starf hjá ÍBV.

ÍBV gekk hörmulega undir stjórn Pedro í sumar og situr liðið í neðsta sæti Pepsi Max-deildarinnar.

Þeir Andri og Vilhjálmur ræða Pedro í þættinum en hann kom eins og þruma úr heiðskýru lofti inn í íslenska boltann.

,,Það sem ég var að hugsa með hann. Mér datt í hug, ég las ekki bókina en hún var lesin fyrir mann í grunnskóla, Brekkukotsannáll eftir Laxnes,“ sagði Andri.

,,Þar var frægur óperusöngvari, Garðar Hólm og hann mætti bara á pöbbinn og var aðal stjarnan. Hann var syngjandi út um allan heim og svo kom í ljós að hann var enginn söngvari.“

,,Ég velti því fyrir mér hvort að Pedro sé bara einhver svindlari? Hann skilur eftir sig sviðna jörð, alls staðar þar sem hann kemur.“

,,Þetta er svo furðulegt dæmi. Hann nær að selja sig eins og Mourinho eða hver það var.“

Þar á Andri við að Pedro fékk víst meðmæli frá Rui Faria, fyrrum aðstoðarmanni Jose Mourinho sem er einn sigursælasti þjálfari heims.

Vilhjálmur bætir við hvort að Pedro sé ekki bara svikahrappur sem tókst að ljúga sig inn í starf hér heima.

,,Er þetta ekki bara svikahrappur? Bara einhver Nígeríusvindlari!“ sagði Vilhjálmur en það er stórt spurningamerki, hvernig Pedro fékk þessi störf til að byrja með.