Jesse Lingard, leikmaður Manchester United, gæti átt yfir höfði sér refsingu hjá félaginu eftir ósæmandi hegðun.
Lingard kom sér í fréttirnar á dögunum en hann birti þá ansi umdeilt myndband af sér og vinum sem eru staddur í Miami.
Þar mátti heyra Lingard blóta og öskra mikið en hann er nú kominn í sumarfrí eftir langt tímabil.
Hegðun Lingard í myndbandinu þykir alls ekki vera til fyrirmyndar og fékk hann skítkast á samskiptamiðlum.
Ian Holloway, fyrrum stjóri Leicester og Crystal Palace, ræddi hegðun Lingard við TalkSport og kallar eftir því að hann verði seldur.
,,Ég myndi setja hann á sölulista. Stjórinn og starfsfólkið þarf að koma þessu á hreint. Það er engin leið til baka að mínu mati,“ sagði Holloway.
Skoska goðsögnin Ally McCoist tók undir með Holloway og segir að Lingard hagi sér sjaldan eins og fyrirmynd.
