Hlaðvarpsþátturinn, 90 mínútur heldur áfram á fullu fjöri en um er að ræða þátt sem Hörður Snævar Jónsson, ritstjóri 433.is stýrir.

Þátturinn hefur notið mikilla vinsælda en afar áhugaverðir gestir hafa komið í þáttinn.

Gestur þáttarins að þessu sinni er Kolbeinn Sigþórsson sem er einn allra besti knattspyrnumaður sem Ísland hefur átt, þá sérstaklega þegar hann hefur klæðst treyju landsliðsins.

Kolbeini hefur enn ekki tekist að skora í Meistaradeild Evrópu en hann lék þar með Ajax í Hollandi.

Leikir Ajax voru oft erfiðir í deild þeirra bestu og spilaði liðið við stórlið sem voru í hærri gæðaflokk.

Kolbeinn fékk kjörið tækifæri til að skora gegn Barcelona á sínum tíma en liðin áttust við í riðlakeppninni í september árið 2013. Sá leikur tapaðist 4-0.

Þar tókst Kolbeini hins vegar ekki að skora en Victor Valdes, þáverandi markvörður Barcelona, varði frá honum.

,,Hún situr enn í kollinum. Ég held að ég hafi ekki horft á þetta víti fyrr en bara einhverju hálfu ári seinna,“ sagði Kolbeinn.

,,Þá var ég fyrst kominn yfir það. Þetta er hluti af þessu en það var hrikalega svekkjandi að fá þetta tækifæri, víti á Nou Camp.“

,,Við vorum ekki í séns í þessum leik en eiga það á recordinu að skora í Meistaradeildinni, það er svekkjandi. Það er alltaf tími.“

,,Yfir heildina í Meistaradeildinni þá náðum við aldrei að koma okkur í þá stöðu að fara áfram.“

,,Við lentum oftast í dauðariðlum gegn Barcelona, Dortmund og við vorum í þriðja eða fjórða styrkleikaflokki með ungt lið. Hlutirnir smelltu ekki fyrir okkur þá.“