Kári Árnason varnarmaður íslenska landsliðsins, býst við því að ganga í raðir Víkings 1. júlí. Þetta staðfesti Kári við 433.is í dag.
Samningur Kára við Gençlerbirliği er á enda, liðið komst upp í úrvalsdeildina í Tyrklandi.
Kári gekk í raðir Víkings síðasta sumar, en lék aldrei fyrir liðið. Eftir HM í Rússlandi vildi Gençlerbirliği fá hann.
Kári er 36 ára gamall en hann hefur verið einn allra besti leikmaður landsliðsins á mesta blómaskeiði þess.
Kári er Víkingur í húð og hár en Víkingur er eina liðið í Pepsi Max-deild karla sem ekki hefur unnið leik á þessu tímabili.
Hann og Sölvi Geir Ottesen myndu þar með endurnýja kynni sín hjá uppeldisfélaginu. Kári sagði að viðræður við Víking myndu halda áfram eftir landsleikina gegn Albaníu og Tyrklandi.