Víkingur náði aðeins í eitt stig gegn ÍBV í Pepsi Max-deild karla á sunnudag, þrátt fyrir að vera marki yfir og manni fleiri. Tómas Þór Þórðarson, íþróttafréttamaður hjá Sýn, ræddi leikinn í Innkastinu á Fótbolta.net.

Tómas er stuðningsmaður Víkings en Jonathan Glenn jafnaði fyrir ÍBV, í uppbótartíma. Víkingur hefur gert þrjú jafntefli í fyrstu fimm leikjunum, liðið hefur ekki unnið leik.

,,Núna þarf maður að passa lýsingarorðin, svo menn fari ekki að gráta,“ sagði Tómas Þór í léttum tón, í Innkastinu á Fótbolta.net.

,,Bara algjör hörmung, frá upphafi til enda. Meira með boltann, fleiri sendingar. Maður sá í upphafi að þetta yrði ströggl, þungur og blautur grasvöllur. Þetta lið er sett upp til að spila á gervigrasi, alla vegana ekki á þungu og blautu grasi. Þessar sendingar og tiki taka bolti sem þeir hafa verið að nota, var ekki að ganga til að byrja með, þegar það er ekki að ganga þá þarftu að fara í íslenskan vorbolta.“

Víkingur hefur fengið jákvætt umtal, mikið af ungum strákum og fótboltinn skemmtilegur. Það gefur hins vegar lítið af stigum.

,,Þetta var algjört högg, fá lið hafa fengið jafn gott umtal, meðal annars frá mér. Þrátt fyrir að hafa ekki unnið leik, að gera siðan jafntefli við ÍBV í Vestmannaeyjum, Víkingar eru síðustu tuttugu mínúturnar, marki yfir, manni fleiri og 60 prósent með boltann. Þeim tekst ekki að vinna leikinn, það verður ekki mikið verra.“