Það vakti athygli á laugardag að Elfar Freyr Helgason, einn besti miðvörður Pepsi Max-deildarinnar var ekki í byrjunarliði Blika. Elfar hefur staðið sig afar vel í liði Blika síðustu ár og myndað frábært par með Damir Muminovic.

Ágúst Gylfason kaus hins vegar að haf Elfar á bekknum og var Viktor Örn Margeirsson í hjarta varnarinnar. Það skilaði fínum árangri en Breiðablik vann 0-2 sigur á Grindavík.

,,Það kom á óvart að Elfar hafi verið á bekknum,“ sagði Kristján Óli Sigurðsson, sérfræðingur Dr. Football þáttarins.

Hjörvar Hafliðason greindi þá frá því að Elfar hafi ekki klárað leikinn á bekknum, heldur skellt sér inn í klefa.

,,Mínir menn í Grindavík, því Elfar Freyr er einn af uppáhalds leikmönnum Dr. Football. Að hann hafi bara farið þegar þriðja skiptingin var gerð, Guðmundur Böðvar kom inn þegar það voru einhverjar tíu mínútur eftir af leiknum. Þá henti hann sér betur.“

Kristján Óli sagði að Elfar væri karakter sem Breiðablik þyrfti á að halda.

,,Hann er karakter, þannig leikmenn þarf Breiðablik. Honum er ekki sama. Hann fór inn í klefa og hefur náð í bestu sturtuna, hann er væntanlega brjálaður ef hann er heill að vera ekki í liðinu. Í fyrra kom Viktor Örn inn og stóð sig vel þegar Elfar var meiddur og hann var góður í dag, ég hef smá áhyggjur af vini mínum Elfari. Hann kemur sterkari til baka.“