Kvikmyndaleikarinn Zac Efron er ekki vinsæll á meðal stuðningsmanna Arsenal í ensku úrvalsdeildinni þessa stundina.

Efron er þekktur leikari í Bandaríkjunum en hann hefur leikið í ófáum kvikmyndum sem landsmenn ættu að kannast við.

Efron er eins og margar aðrar stjörnur knattspyrnuaðdáandi og mætir af og til á leiki.

Hann er búsettur í Los Angeles í Bandaríkjunum og styður sitt lið, Los Angeles Galaxy í MLS-deildinni.

Efron horfir einnig á enska boltann og héldu flestir að hann væri stuðningsmaður Arsenal eftir að hafa mætt á nokkra leiki á sínum tíma.

Fyrir fimm árum var Efron myndaður í treyju Arsenal og mætti á leik liðsins á Emirates vellinum.

Nú er útlit fyrir að þessi 31 árs gamli leikari sé búinn að finna sér nýtt lið eftir að hafa mætt á leik Tottenham og Brighton í gær.

Þar klæddist kappinn treyju Tottenham og hefur hann fengið töluverða gagnrýni frá enskum knattspyrnuaðdáendum.

Það er mikill rígur á milli Tottenham og Arsenal og er af flestum stranglega bannað að styðja við bakið á báðum liðum.