Atli Eðvaldsson, fyrrum landsliðsmaður í knattspyrnu, ræddi við Heimi Karlsson í gær en hann var gestur í svokölluðu páskaviðtali.

Atla ættu allir að þekkja en hann lék á sínum tíma 70 landsleiki fyrir Ísland og þjálfaði svo liðið frá 1999 til 2003.

Hann hóf ferilinn hér heima með Val og skoraði þá 31 mark í 93 leikjum með meistaraflokk áður en hann hélt til Borussia Dortmund.

Atli segir frá skemmtilegri staðreynd í viðtalinu sem tengist bróður hans, Jóhannesi Eðvaldssyni.

Jóhannes var einnig atvinnumaður og lék lengst með Celtic í Skotlandi í fimm ár frá 1975 til 1980.

Þeir voru fyrstu bræðurnir til að mætast í Evrópuleik er Valur og Celtic mættust árið 1975.

,,Fyrsti Evrópuleikurinn gegn stórliði var Celtic árið 1975 og þar var Búbbi bróðir. Við vorum fyrstu bræðurnir sem mættust í Evrópuleik!“ sagði Atli.

,,Leikurinn fór 2-0 hér heima fyrir Celtic og svo fóru þessir ungu 16-17 ára strákar til Celtic fyrir framan 70 þúsund manns og við töpuðum 7-0.“