Troy Deeney, leikmaður Watford, þurfti að bregðast við í dag eftir ummæli sem hann las á Instagram.

Deeney lék með Watford í gær gegn Wolves í enska bikarnum og skoraði í mögnuðum 3-2 sigri.

Deeney varð fyrir kynþáttaníði á Instagram-síðu sinni eftir leikinn í gær en rasismi er gríðarlegt vandamál á Englandi þessa stundina.

Deeney var ekki sá eini sem skotin beindust að en fjölskylda hans var einnig nefnd sem er óskiljanlegt og alls ekki við hæfi.

,,Vegna atvika sem hafa átt sér stað síðustu 24 klukkutímana þá hef ég ákveðið að gera ummælin óvirk,“ sagði Deeney.

,,Fyrir mér þá er þetta ekki bara leikur – þegar þú ert með rasisma í garð mín og minnar fjölskyldu þá verð ég að taka á því svona, til að koma í veg fyrir að ungt fólk sjái þessi ummæli og haldi að þau séu eðlileg.“

Deeney og félagar eru á leið í úrslit bikarsins og munu þar mæta Englandsmeisturum Manchester City á Wembley.