Leikmaður í ensku úrvalsdeildinni, sem hefur meðal annars spilað í lokakeppni heimsmeistaramótsins í knattspyrnu, hefur verið tilkynntur til lögreglunnar vegna vægast sagt ósiðlegrar hegðunar.
Breskir fjölmiðlar fjalla um málið í morgun en af lagalegum ástæðum er ekki hægt að nefna leikmanninn á nafn.
Að því er fram kemur í frétt Mail Online er leikmaðurinn grunaður um að hafa áreitt unga konu kynferðislega á næturklúbbi fyrir skemmstu. Káfaði hann og þuklaði á konunni. Leikmaðurinn er sagður hafa tekið þetta upp á myndband sem hann sendi svo vinum sínum. Að því loknu hélt hann áfram að káfa og þukla á konunni sem tilkynnti málið til lögreglu.
Leikmaðurinn er sagður hafa verið verulega drukkinn og fyrr um kvöldið hafi hann einnig notað svokallað hippakrakk, eða hláturgas.
Í fréttum enskra fjölmiðla kemur fram að maðurinn hafi boðið ungu konunni inn á svokallað VIP-svæði á næturklúbbnum sem er í London. Hann hafi svo farið á eftir henni á dansgólfið þar sem áreitið fór fram.
Konan segir að hún hafi ekki sýnt leikmanninum neinn áhuga og það hafi farið í taugarnar á honum. Hann hafi brugðist við með því að sína sífellt meira óviðeigandi hegðun. Leikmaðurinn hafi beðið konuna um að koma með sér heim en hún neitaði. Óvíst er hvort einhverjir eftirmálar verði af atvikinu en líklega mun lögregla fara yfir eftirlitsmyndavélar á umræddum skemmtistað.
