Manchester United tapaði mikilvægum stigum í ensku úrvalsdeildinni í gær er liðið mætti Wolves.
United komst yfir snemma leiks er Scott McTominay skoraði með fínu skoti fyrir utan teig á 13. mínútu. Diogo Jota jafnaði svo metin fyrir Wolves á 25. mínútu og var staðan jöfn eftir fyrri hálfleikinn.
Það var svo Chris Smalling sem skoraði síðasta markið á Molineux en hann varð fyrir því óláni að skora sjálfsmark á 77. mínútu. United spilaði með tíu menn lengi vel í seinni hálfleik en Ashley Young fékk rautt spjald á 57. mínútu og var rekinn af velli.
Tapið gerir United erfiðara fyrir að ná Meistaradeildarsæti, þar sem fjögur lið berjast um tvö sæti.
Solskjær hefur tekið upp reiknivélina og heimtar 15 stig úr sex síðustu leikjunum. ,,Ég talaði um 18 stig fyrir átta síðustu leikina. Við náðum þremur stigum gegn Watford,“ sagði Solskjær.
,,Núna þurfum við fimmtán stig úr síðustu sex leikjunum, við getum því ekki misstígið okkur mikið.“
