Jordan Pickford, markmaður Everton, skellti sér aðeins út á lífið um helgina eftir leik liðsins við West Ham. Pickford er uppalinn hjá Sunderland og hann sneri aftur þangað og skemmti sér með vinum sínum. Markmaðurinn lenti þó í vandræðum fyrir utan skemmtistað en þar áttu sér stað ansi harkaleg slagsmál. Ekki er ljóst hvernig þessi slagsmál byrjuðu en myndband af þeim hefur verið birt á netið.

Lögreglan í Sunderland er með málið til rannsóknar en ensk blöð fjalla miki um málið, enda er Pickford fremsti markvörður Englands í dag og stendur vaktina í landsliðinu. Lögreglan var kölluð á vettvang eftir að höggin fengu að fljúga en dyravörður er sagður vera með glóðarauga, eftir tvö högg frá Pickford.

Ensk blöð segja að Pickford hafi verið búinn að drekka allan daginn, hann hafði verið að horfa á sitt gamla félag spila, á knæpu í bænum.

Nú segja ensk blöð að ástæða þess að Pickford hafi sturlast, sé vegna þess að kona hans var niðurlægð. Stuðningsmenn Newcastle höfðu verið að bauna á Pickford, sem lét ekkert á sig fá. Það var hins vegar þegar kona hans fékk að heyra það, að hann sturlaðist og slagsmálin fóru á flug.

,,Fituklessa,“ var öskrað á Megan Davison, unnusta hans og við það fór allt í bál og brand.

Eiginkona hans hafði mætt á skemmtistaðinn en Pickford varð reiður, þegar hún fékk fúkyrði yfir sig.

Pickford spilar mikilvægt hlutverk í liði Everton þar sem Gylfi Þór Sigurðsson er fastamaður á miðjunni.

Jordan Pickford fighting like a nonce pic.twitter.com/rls9vcBV9e

— HeadzGone (@HeadzGone) 1 April 2019