Knattspyrnumaðurinn Adam Johnson er nú laus úr fangelsi og hefur flutt heim til sín á ný.

Johnson var dæmdur í sex ára fangelsi árið 2016 en hann var kærður fyrir að bæði snerta og kyssa stúlku undir lögaldri. Hann losnaði eftir aðeins þrjú ár.

Johnson er fyrrum atvinnumaður í knattspyrnu og lék með liðum á borð við Manchester City og Sunderland. Johnson á einnig að baki 12 landsleiki fyrir England.

Hann hefur verið upptekinn undanfarna daga og er duglegur að þrífa setrið sitt eftir heimkomuna.

Frá þessu greina enskir miðlar en Johnson starfaði sem einhvers konar húsvörður er hann var læstur inni. Hann gerir fátt annað en að þrífa þessa dagana.

,,Hann gerir þetta til að höndla frelsið sem hann hefur í dag. Hann var orðinn svo vanur því að vera inni og er í erfiðleikum með að takast á við lífið utandyra,“ er haft eftir kunningja Johnson.

,,Hann sá um þrif í sínu síðasta starfi. Hann hefur gert það á hverjum degi undanfarna mánuði og heldur sig við það. Hann er að venjast lífinu fyrir utan og heldur áfram að gera það sem hann er vanur.“

Einnig er greint frá því að Johnson hafi verið duglegur að panta sér heimsendingu af mat síðan hann slapp úr fangelsi og íhugar að flytja erlendis.

Hann veit það sjálfur að knattspyrnuferillinn á Englandi er á enda og er að skoða það að byrja upp á nýtt í Asíu.