Eins og flestir vita hefur gengið erfiðlega hjá sóknarmanninum Aroni Jóhannssyni síðustu ár.
Aron er 28 ára gamall sóknarmaður en hann hefur spilað með Bremen frá árinu 2015.
Hann hefur hins vegar aðeins skorað fjögur mörk í 27 deildarleikjum og er það aðallega vegna meiðsla.
Aron lék áður með AZ Alkmaar við góðan orðstír og fór með bandaríska landsliðinu á HM árið 2014.
Nú er Aron að snúa aftur eftir þrálát meiðsli en hann greindi sjálfur frá því á Instagram.
Aron lék með varaliði Bremen í dag sem mætti Lupo-Martini Wolfsburg í Þýskalandi.
,,Ég hef lært mikið undanfarið ár, að snúa aftur á völlinn að spila eru svo mikil forréttindi,“ skrifaði Aron.
,,Ég er svo ánægður með að vera kominn aftur. Þakkir til allra sem hafa hjálpað mér í gegnum þessa erfiðu tíma.“
,,Nú horfum við fram veginn með ekkert nema jákvætt hugarfar.“
